eller midt i mellom

omdøyping og omplassering

2010-03-30T15:39:00.000-07:00

Sidan eg aldri har vore heilt nøgd med namnet på bloggen min har eg skifta namn og difor òg bloggadresse. Her kan du finne bloggen min med nytt namn og ny adresse.

Kjærleik på ny

2010-03-29T09:22:00.000-07:00

Eg har forelska meg på ny. Eg har kjennt ho før, denne kjensla, og no er ho her igjen. Eg har forelska meg på ny, og min kjærleik er Pink Floyd. Då eg høyrde wish you were here for fyrste gong var eg fortapt. Eg var solgt. Eg var forelska. No har det gått ei lang tid med lite Pink Floyd inntil eg for nokre dagar sidan låg the division bell i spelaren. Eg hadde gløymt kor fantastisk det var, men no kjem det tilbake. Og då eg på ny høyrde wish you were here på bussen i dag gjorde det fysisk vondt - så flott er det. Det er rart korleis enkelte band og songar treff så ufattelig godt og korleis det er så ulikt frå person til person kva som treff.

Her får du det som er nokre av mine favorittstrofer over alle andre strofer. Det er berre ord. Det er berre musikk. Men hos meg treff det midt i.

we're just two lost souls
swimming in a fish bowl,
year after year,
running over the same old ground
what have we found?
the same old fears
wish you were here

Kva treff deg?

Uutgrunnelig magisk

2010-03-23T13:57:00.000-07:00

"Den aller første jeg festet meg ved, var en morsom jente som stod i midtgangen med en svær papirpose bredfull av frodige appelsiner (...) Men det var ikke først og fremst posen med appelsiner jeg bet meg merke i, det var den unge damen selv. Jeg forstod med en gang at det var noe helt spesielt ved henne, noe uutgrunnelig magisk og fortryllende"

- Jostein Gaarder, Appelsinpiken

I dag såg eg appelsinmannen. Han stod der og venta ved overgangsfeltet. Plutseleg såg eg han stå der og vente. Og eg greier ikkje å gløyme han. Han var kledd til fest i svart dress, svarte sko, kvit skjorte og eit raudt slips. Eller kanskje kom han frå jobb? Eller kanskje tenkte han litt som eg ofte gjer; at kvar dag er ein fest og nokon anna grunn til å pynte seg treng ein ikkje. Men det spesielle var ikkje korleis han var kledd, men heller at han stod der og venta med tre appelsiner i hendene - to i venstre handa og ei som han dreiv og kasta litt opp og ned i den høgre handa. Han var appelsinmannen. Han stod der og venta og var appelsinmannen. Og eg greier ikkje å gløyme han.

Som i ein film

2010-03-22T09:24:00.000-07:00

Av og til ser eg alt rundt meg som i ein film. Som når eg sit på bussen og høyrer bussjåføren skru opp volumet då "Bridge over troubled water" kjem på radioen og eg ser vidaugsviskarane som viskar og viskar og dråpane som målar vindauget prikkete om att og om att og aldri gjev opp, som i ein ævedans. Og lysa frå gatelyktene som dansar med og kjærteiknar andleta til pasasjerane - ein etter ein. Og mørkre der ute når eg kviler hovudet mot det kalde vindauget og stirar på verda som forsvinn bak oss eller som kjem imot oss.

Då tenkjer eg at "dette kunne vore ei scene i ein film".

england i bilete

2010-03-14T11:37:00.000-07:00

i vinterferien reiste eg og Rebekka til England, og det var litt sånn her:

eg drakk te! blåbærte. og blåbærmuffins. nam!

og vi reiste mykje både under og over bakken

vi reiste blant anna med buss til ei fin piknikmark!

og ein mann lika hatten til Rebekka. det gjorde eg og.

og ja.

dei ukjende

2010-03-12T01:37:00.000-08:00

Av og til skulle eg ønskje eg kunne sjå inn i livet til ho som sat ved nabobordet på kaféen, eller han som høyrde på altfor høg musikk på bussen, eller den gamle ekspeditøren i bruktbutikken som skalv sånn på hendene. Av og til skulle eg ønskje eg visste kven desse menneska var - dei som vi omgir oss med. Dei som ofte er så nære, men som vi ikkje veit anna om enn at dei skjelv på hendene eller at dei høyrer på ABBA eller at dei likar te og muffins.

Av og til skulle eg ønskje det var litt slik:

"Jeg husker en gang jeg fløy over byen. Jeg skuet ned på alle husene og kunne velge fritt hvor jeg ville dale ned for å kikke inn i stuene og soverommene til folk. Gjennom vinduene så jeg hvordan de forskjelligste mennesker levde, slik fantes det ikke den hemmelighet som jeg var avstengt fra å oppleve."

-Jostein Gaarder, Sirkusdirektørens Datter

Bøker

2010-03-09T11:10:00.000-08:00

Eg likar å ha mine eigne bøker - å eige dei, ikkje berre bibliotek-låne dei (eg elskar bibliotek, misforstå meg rett, men det er eit anna innlegg). Slik kan eg streke under fine setningar og avsnitt i bøkene og dra dei fram gong på gong om det så berre er for å lese favorittavsnittet. Slik kan eg låne dei vekk til andre som vil setje pris på dei. Eg kan dra dei med meg over heile verda utan å bekymre meg for å slite dei ut, eg kan lese i mitt eige tempo og bokhylla mi vert sjåande meir ut som ei bokhylle.

Her er noko eg streka under i ei av bøkene mine i går då eg ikkje fekk sove:

"Det var altfor lett å fantasere, det var som å danse på tynn is, det var som å gjøre snodige piruetter på en glissen hinne over mange tusen favners dyp. Det var alltid noe kaldt og mørkt som lå og spøkte under overflaten."

"Vi sprudlet, vi bruste, det var som om vi badet i champagneskum."

-Jostein Gaarder i Sirkusdirektørens Datter

Nattestankar

2010-03-09T11:06:00.000-08:00

Innimellom har eg netter då hovudet er for fullt av tankar til å sove. Desse nettene har ein tendens til å kollidere med dei nettene då eg eigentleg er altfor trøytt til å tenkje.

Det er det ein kallar ein dårleg kombinasjon.

I lommeboka mi

2010-03-09T09:01:00.000-08:00

I lommeboka mi ligg det:

- Kvitteringar:

Frå Marks & Spencer i St. Peters St, St Albans
Frå Leon i Spitalfields, London
Frå The Pie Shop i Covent Garden, London
Frå Loco Mojito i Brick Lane, London
Frå Eton Antique Book Shop i High St, Windsor
Frå Starbucks i Camden, London

- Bussbillettar:

Rickmansworth stn - St Albans stn
St Albans stn - Rickmansworth stn

- Reisekort:

London Underground 01 day travel card

- Pengar:

2.20 pund

Eg saknar det allereie!

eple

2010-02-24T23:37:00.000-08:00

hin kvelden måtte eg smile litt av kombinasjonen på bordet framfor meg

It's only rock 'n' roll..

2010-02-22T00:04:00.000-08:00

Eg går opp den lange bakken nok ein gong. Eg vert sprø når eg tenkjer på kor mange gonger eg har gått opp den same bakken. Kor mange gonger eg går opp og ned den bakken var dag. Kvite små flak treff beina mine. Håret mitt. Det stikk i dei bare armane under den tynne jakka. Eg har teke på meg vårjakka mi i protest. Denne nye vinteren ser ikkje sine eigne begrensningar. Verkeleg. Likevel smiler eg av snøen som dalar så fredleg og som smeltar på tunga.

Halvegs inne i korridoren, nokre meter frå døra mi, lyser eg opp og spring. Ja, eg spring faktisk. Tek skikkeleg sats og spring så den gamle skinnsekken til mor slår mot ryggen. Eg riv opp døra til rommet mitt, nøler eit sekund og snur meg for å sjå om nokon har sett meg. Det er ingen der. Eg er åleine. Eg smiler og gjev kanskje frå meg eit lite gledeshyl. Inne i gongen hiv eg av meg sekken. Den kalde vårjakken. Tøyskorne som er våte av snøen. Halvegs spring og halvegs dansar eg inn på rommet, slår på PCen, finn det er leitar etter og trykkjer "play". The Rolling Stones ljomar ut frå høgtalarane og eg hoppar, dansar og syng med luftgitar, lufttrommer og er rockedronning for berre ei lita stund.

It's only rock 'n' roll but I like it!

ein av fire

2010-02-20T03:20:00.000-08:00

Den dagen eg skreiv innlegget "free as a bird" gjekk denne songen på repeat både på rommet mitt og, når eg ikkje var der, i hovudet mitt. Den er så herleg. Verkeleg. Så no kunne eg ikkje la vere å dele den med dykk. Her får de han når Lennon syng han. Nyt!

Hjartepost

2010-02-19T00:24:00.000-08:00

Eg skreiv i eit tidlegare innlegg om post og at eg hadde sendt to pakkar den dagen. Ein av dei pakkane vil eg skrive litt om. For den er nemleg ein del av eit fint, fint prosjekt som er starta av bloggaren hjartesmil. Prosjektet gå ut på at alle som vil vere med sender inn litt info om seg sjølv (kva ein likar, ikkje likar..) og så får ein etter kvart ein mail der nokon andre har skrive litt info om seg sjølv. Ut ifrå denne infoen skal du setje saman ein presang med minst fem ting som du skal sende til den personen det står om i mailen. No skjønar du sikkert òg at det er nokon andre som har fått mailen med info om deg og skal sende pakke til deg. Om ein er glad i å få post og likar å lage gaver er dette midt i blinken! Eg tykkjer òg det er fint at ein kan sende fine gåver til folk ein eigentleg ikkje kjenner. Kanskje får du deg ein brevven? Og det er jo fint.

Om du syns det høyrdes ut som eit fint prosjekt, kan du gå inn her og lese meir detaljerte reglar og melde deg på.

Kva tykkjer du er fine ting å sende i posten?

Free as a bird

2010-02-13T14:44:00.000-08:00

Skihopp er eit bevis på at menneske aldri vil nøye seg med det vi kan. Vi vil alltid strebe etter det uoppnåelege. Og hopparane, dei vil fly. Dei konkurrerer om å bli best i noko dei ikkje kan. Og den som vinn vert, når alt kjem til alt, berre den med det minst mislykka forsøket. For dei landar ganske kjapt. Uansett kor hardt dei prøver, vil dei etter nokre sekund lande. Og om eg hadde vore ein fugl, ville eg nok ledd av deira nytteslause forsøk. Det ville vore som å sjå ein katt prøve å gjere som eit menneske. Det ville vore eit dårleg klipp på AFV. Det ville vore latterleg.

Men kanskje er det ikkje så dumt? For dei flyg jo. Om berre i nokre sekund, så svevar dei i lause lufta. Free as a bird. Og er det ikkje betre å gjere eit forsøk og få fly i nokre sekund enn å sitje på jorda og le av at dei landar? Kanskje er det ikkje nyttelaust likevel.

Joda, så. Kva gjer du ein laurdagskveld?

Tankar på ein serviett

2010-02-12T08:12:00.000-08:00

Post fascinerer meg. I dag har eg sendt to pakkar og fått eit brev, og eg er altså skikkelig fascinert over konseptet post. Om ein vil kan ein søkje på eit fint namn på gulesider.no og sende personen fine ord i postkassa. Om ein vil kan ein lyse opp kvardagen til ein ven, sjølv om han/ho bur så langt vekke som berre det. Og no tenkjer du kanskje: det kan ein jo lettare gjere ved å ringe personen, eller ein kan sende mail eller ta kontakt på facebook. Då får ein jo sannsynlegvis tak i personen same dag og kan glede han/ho der og då. Sant nok, seier eg, men det er noko eige med eit brev. Eg trur ein lettare får sagt det ein skal i eit brev enn i telefonen, eller på facebook chaten. Og eg må sei at eg vert gladare om eg finn eit brev i postkassa enn om nokon skriv til meg på nettet.

Brevet eg fekk i dag var skrive på ein kvit serviett og det var kanskje det finaste brevet eg har fått. Vertfall på lenge. Det var eit brev med kjærleik, dog intet kjærleiksbrev. Det var fine og inspirerande tankar om livet på ein serviett. Det var slike ord som får ein til å ville gå ut og gjere godt mot alle, og det er gode ord det. Takk Rebekka!

Post eit brev i dag (eller kanskje i morgon, sidan det er litt seint no..)!

Blått så langt ein ser

2010-02-07T13:34:00.000-08:00

På rommet mitt heng eit ark. På arket er det teikna eit hjarte. Langs hjartelinjene er det skrive nokre ord, og orda er desse: Sundagar er smil i kvardagen. Syltetøy på skjeva. Kakao framfor peisen. Sundagar er ro i sjela. Blått så langt ein ser. Sundagar er dagar fylt med kjærleik. Det tykkjer eg stemmer ganske godt. Vertfall på mange sundagar. I mitt hovud er sundagane òg blåe. Korleis er dine sundagar?

Sundagar er fine dagar for analoge muffins. (Klikk på biletet for kjelde)

Kanskje

2010-02-06T09:07:00.000-08:00

Kanskje skal eg verte radiograf og ta bilete av skuldera og halsen din..?

Ja, kanskje det, kanskje.

Ein piknik i England

2010-02-04T09:19:00.000-08:00

Eg veit ikkje kva eg skal gjere neste år. Eg syns det er vanskeleg. Eg slit.

Men om eg berre kunne bestemt heilt korleis ting skulle vore utan å tenkje på økonomiske eller andre typar begrensningar ville eg nok reist til England ein stad der eg ville budd på eit lite loft hos eit koselig gamalt ektepar som lot meg ete middag med dei og som ba meg kjøpe sukkerbitar med heim frå butikken. Og den gamle dama ville lært meg å sy fine kjolar og så hadde dei begge fortalt meg fine fortelljingar frå liva deira. Og eg ville laga blåbærpai til dei og teke dei med på piknik i parken.

Og eg ville elska å sjå i fotoalbuma deira.

Eg hadde funne meg ein fin kafé som ville gje meg ein jobb og så ville eg kjøpt meg eit analogt kamera som eg ville eksprimentert mykje med og så ville eg kjanskje gått på eit fotokurs og vorte skikkelig flink. Og så ville eg ha lært meg å snakke flytande engelsk (britisk!) og det ville vore så herleg og eg hadde smilt frå øyre til øyre der eg rusla rundt frå loppemarked til loppemarked.

(Kjenner du eit slikt ektepar i England? - Call me.)

Kanskje Led Zeppelin

2010-01-31T07:10:00.001-08:00

Eg traff ein mann på ein buss.
Han lika best musikken frå 60- og 70-talet, nett som meg.
Favorittane hans var kanskje, om han måtte velje, Led Zeppelin.
Men det var nok mest på grunn av den dyktige gitaristen.
Han hadde ein tendens til det, sa han;
å høyre mest på gitaristen i bandet.
Det var fordi han spela gitar sjølv.
Han hadde spela i band i 30 år.
Og så var han altså imponert over at eg høyrde på Tom Waits.
Og det tilogmed på vinylplater.
Eg trur han er ein bra mann.
Eg er for å snakke med framande på bussen.
Eller på ein kafé.
Eller andre stader.
Vertfall avogtil.
Eller kva?

2010-01-29T04:21:00.000-08:00

I dag vil eg berre sitje framfor platespelaren og lytte og nyte og drøyme og snu plata om og om igjen med jamne mellomrom. Den plata som mannen på bussen var så imponert over at ei "dame" som meg kunne høyre på (det skal eg skrive om seinere, kanskje).

Men eg må skrive oppgåve i sosialkunnskap. I hele dag. hurra.

i dag har eg

2010-01-26T03:45:00.000-08:00

lese eit kapittel eller tre i ei bok der eg har ringa rundt nokre ord, bl.a. "folk snurra rundt seg selv med paraplyene i vinden". fint?
vondt i hovudet og kvalme i magen
blomstrete tights og skjørt for å kjenne meg litt betre
sølt kaffi og vatn på meg sjølv
ei sjuk romvenninne
lyst på ei skrivemaskin

Kva har du i dag?

menneske, draumar, hanskrift og polaroidbilete

2010-01-25T13:01:00.000-08:00

Dette er kva eg kallar vakkert. Menneske og draumande deira. Og handskrifta deira. På polaroidbilete. Eg er ein slik person som kan gå rundt i gatene og lure på kva menneska eg treff på tenkjer. Kva dei et til frukost eller kva deira skjulte talent er eller kva dei meiner om livet og slikt. Eg er òg ein slik person som tenkjer det er synd at ikkje fleire eig og nyttar polaroidkamera. Denne sida traff meg altså midt i hjarta. Og sjå så fint det er å sjå personen saman med hanskrifta hans/hennar. Ein får på ein måte del i endå ein liten bit av denne personen si verd. Fint fint fint! seier berre eg.

Klikk på eit av bileta for å besøke sida!

Fascinerande

2010-01-14T00:14:00.000-08:00

For tida syng Tom Waits for meg heile dagane. Det tykkjer eg er fint. Den mannen er unik. spesiell. talentfull. sær. morosam. stilfull. mørk. Og eg kan ikkje la vere å la meg fascinere. Han er rett og slett ein voldsomt fascinerande mann. Og ja, ein del av musikken hans vert i særaste lager for meg òg men den andre delen er fantastisk og gjev meg gåsehud over heile meg.

Eg tykkjer det passa fint med denne sangen, fordi i går fann eg ei side der du kan lese Alice In Wonderland på nettet og det var så fint. Eg er komen til kapittel sju.
Det har seg slik at eg har verken lese eller sett Alice In Wonderland før, og sidan eg skal sjå filmen når eg er i London i vinterferien tenkte eg det var fint å ha eit forhold til historia. Har du lese Alice In Wonderland?

Marc Johns

2010-01-09T10:06:00.001-08:00

Dette er visst dagen for å finne skattar. Dagens andre funn er kunsten til Marc Johns som er heilt annleis enn det eg posta i førre innlegg, men som eg òg fall pladask for. Om du likar teikningane eg har posta her må du vitja sida hans, for det er meir der det kjem frå!

Den øverste teikningen passa ganske bra sidan eg eigentleg skulle lese historie då eg fann denne sida. morro.

Ein anna skatt eg har funne (att) i dag er konsentrasjonen min. Den har eg leita etter ei stund no, så hurra! for det. God laurdagskveld i stova!

Maggie Taylor

2010-01-09T01:53:00.000-08:00

Man with too mutch time

Poet's house

Birthday Girl

Surrounded

It's always tea-time

I dag kom eg tilfeldigvis og heldigvis over desse bileta på sida til Maggie Taylor, som er kunstnaren bak. Og eg fall pladask. Besøk sida hennar så får du sjå bileta større og i betre kvalitet i tillegg til mange fleire stilige bilete.

Har du funne noko fint i det siste?

dagens bilete

2009-12-31T07:07:00.000-08:00

nyttårsforsett

2009-12-29T05:38:00.000-08:00

I dag har fyrste del av dagen gått med til god frukost, mykje kaffi, radio, idémyldring til ny, fin blogg og munnspeløving. Mine nyttårsforsett skal vere å gjennomføre idéane eg har til ein ny blogg og å lære meg å spele minst éin song eg likar på munnspel. Gjennomførbare og greie forsett vil eg sei. Kva er dine?

I dag er det..

2009-12-28T04:58:00.000-08:00

..raud leppestift-dag

..bakedag

..Ray Charles-dag

kva dag har du i dag?

latterkule og lykkyl

2009-12-25T16:03:00.000-08:00

i kveld lo eg så hardt som eg aldri har gjort før. nåja, vertfall hardare enn eg har gjort på ei veldig lang stund. det var ei av dei latterkulene som plutseleg kjem for å bli. eg lo så eg grein. bokstaveleg talt. det var under kokkelimonkespelinga med mamma, pappa og bror min. det er godt å tømme seg for latter no og då.

i spelet kom vi over eit ord som alle greidde å gjette (og det er skjeldan i kokkelimonke). Veit du kva ordet "lykkyl" frå gamalnorsk tyder?

kvar ein augneblink frå no av

2009-12-25T13:40:00.000-08:00

eg gler meg storleg til kvar ein augneblink i resten av mitt liv. til kvar himmelske og kvar falske tone eg skal høyre, kvar duft, men òg kvar stank som skal gje meg kriblingar, gode eller vonde, i kroppen. eg gler meg til smil under store bartar, til å tørke tårer på raude kinn. eg gler meg til alle mine fyrstegongsopplevingar og til dei tinga eg etterkvart kan gjere i blinde og med begge armane på ryggen. eg gler meg til hemmelege blikk, latter i seine nattestimar, reiser til stader som berre ligg der og ventar på å bli oppdaga og likeins til at framandfolk skal verte kjentfolk. eg gler meg til å verte overraska over å finne ut kor glad eg er i nokon, til klemmar som varmar meir enn kakao og ein peis når du har vore ute i snøen, til ord som leikar seg på blanke ark og som kanskje får meg til å smile, eller le, eller grine.

og eg vil nyte kvar ein augneblink. kvar ein augneblink frå no av.

Hugsar du den gongen...

2009-12-24T15:53:00.000-08:00

"minne, minne på en pinne
det var alt jeg kunne finne"

..står det så fint i minneboka mi frå barneskulen. Men eit minne er då ikkje berre berre. Minner er for meg gull verd. På pinne eller ei.

Det er fint å hugse tilbake til den gongen mamma tok oss ungar med seg ut i mørkret ein kveld det var venta ein regnskur av stjerneskot. Eg hugsar at vi låg der på ryggen i snøen og såg på stjernehimmelen. Eg anar ikkje om vi såg stjerneskot, men fint var det, og fint er det å tenkje tilbake på.

Eller meir nyleg: den gongen eg og syster mi reiste til by'n for å kjøpe julepresangar og vi måtte gå arm i arm heile dagen fordi eg, uvetug som eg kan vere, hadde teke på meg glatte sko med høge hælar som ikkje gjekk så bra på gatene som var isete og slapsete. Om nokon hadde følgd etter oss heile den dagen hadde dei fått seg ein sabla god latter. Det såg nok ut som syster mi hadde med seg ein fyllik på bytur, eller ein pasient av eit eller anna ustabilt slag som ho skulle passe på.

Minne, minne på ein pinne..

Fortel meg eit fint minne du har, då vel!

Tekoppar

2009-12-20T10:52:00.000-08:00

Eg vil
samla på gleda,
fylla henne
i små fine tekoppar,
og ta ho fram
når dagane er vonde.
Eg vil fylla mitt hus,
setja dei
i hyller og skap,
finna små overraskingar
når eg opnar,
for gleda er
ein handfast ting.
Spent vil eg kikka
oppi ein kopp,
som alle har ulike mønster,
frå alle kantar
av livet.

Av Reidun Fjereide Algrøy frå diktsamlinga hennar Mellom menneske

J+P+G+R = SANT

2009-12-16T14:26:00.000-08:00

bilete
Som godgutane sjølv ville sagt; alt du treng er kjærleik.

mannen i gata

2009-12-13T14:04:00.000-08:00

når ein går bøssebæring i Bergen by treff ein på mange menneske. rare menneske. fine menneske. fine, rare menneske. det er ganske fascinerande og eg likar det fordi ein får litt meir kontakt med dei ukjende på gata enn berre eit smil, samtidig som ein får gjort noko bra for folk som treng det.

desse traff eg i går:

eit ungt par med eit juletre på slep (kanskje skulle dei feire si første jul saman?)
ein tidlegare framneselev som vart nostalgisk og ville nesten bli med meg tilbake, trur eg
ein mann med Abbey Road-button på jakken og ein brun og slitt gitarkasse i handa (skal tru om han hadde ein gitar i kassen eller om han berre har ein så stor draum om å vere gitarist at han går rundt i byen med ein tom gitarkasse for å overbevise seg sjølv så vel som andre om at han er det)
ein mann som smila, røyka og lo om kvarandre og virka som han hadde mykje å snakke om, men ingen å snakke med det om
ein mann som siterte Moder Teresa og vart kvalm
superentusiastiske kristenfolk
ein irsk bartender med det som sikkert var dottera hans
ein mann som likna på kaféen han kom ut ifrå

2009-12-11T15:28:00.000-08:00

Eg skal gifte meg med Eric Clapton.

2009-12-11T04:09:00.000-08:00

Og kjolen kviskrar kring ho,
og eple-knea lær.
- frå Flødande Vår av Kristofer Uppdal

Ord fascinerer meg. korleis ein kan sei ting på så mange ulike måtar. og korleis ein kan få fram så mange stemningar berre ein nyttar dei rette orda. Dette er den finaste setninga eg har lese på ei stund.

have you seen the little piggies

2009-12-11T01:09:00.000-08:00

biletet er henta frå denne fantastiske sida som kvar dag kan dekkje dine behov for nyttelaus lærdom og barnlege teikningar.
men sveitt eller ei - tar ikkje svina deg, gjer nok vaksina det. snufs frå meg dagen derpå.

ja til melk på glasflaske

2009-12-08T05:27:00.000-08:00

Mamma sine julekjeks er gode med melk. Melk er fint på glasflaske. Melk er til dømes mykje finare enn julebrus er på glasflaske. Både finare og betre.

Når eg vert stor skal eg setje ein mann til å komme syklande kvar morgon med ei flaske melk. Ei glasflaske altså. Den kan han setje fint på trappa utanfor den blå døra mi. versågod. tusentakk.

The Girl With Kaleidoscope Eyes

2009-12-07T23:49:00.000-08:00

Det finst uhorveleg mange måtar å nyte The Beatles på. Her kjem ein av dei.

Kvar? -På ei stor, god pute på golvet.
Når? -Seint på natta når du er kjempetrøytt, men ikkje får sove.
Korleis? -Plugg høyreklokkene i platespelaren, så du ikkje vekkjer nokon, legg på favoritt-Beatlesplata og la den snurre og knitre og godgjere øyra dine så lenge du ynskjer.
Kleskode: Stor flanellskjorte. (Gjerne rutete. Gjerne raud.)
Tips: Syng gjerne med (inni deg om du bur saman med nokon som søv) og lær deg teksten utanat.

Bilete

Korleis plar du å nyte The Beatles eller dine favorittar?

på mi øverste hylle

2009-12-05T05:51:00.000-08:00

Om kvelden når det er mørkt og alle har lagt seg er det fint å stå på tå og strekkje armane opp til øverste hylla der julekakeboksen står for å finne den beste kjeksa i boksen. Stille og forsiktig. Endå du har fått kjeksene av mor og kan ete så mange du vil, når du vil.

Eg tykkjer alle kakeboksar burde stå på øverste hyller.

Kva står på di øverste hylle?

I dag

2009-12-03T11:09:00.000-08:00

I dag
- les eg ting eg har skrive tidlegare i den litle boka.
- et eg pannekake til kvelds og kakao til lunsj.
- overhøyrer eg samtalar, litt triste samtalar, mellom filmhyllene på biblioteket.
- vaskar eg rom.
- skriv eg fire ufrivillege sider.
- ler eg litt og smiler litt òg.
- vaskar eg klede.
- ser eg film og et mandarin og julekjeks og drikk julebrus (på glasflaske).
- gløymer eg å kjøpe julelys
- høyrer eg på julemusikk som ikkje alltid høyres heilt ut som julemusikk, men som altså er det.
- ristar eg så fort eg kan på mange snøkuler etter kvarandre slik at det skal snø i alle samtidig.

Kva gjer du i dag?

fin song. fin film.

2009-11-27T15:09:00.000-08:00

Garden State er ein slik film ein berre sit igjen med ei god kjensle etter. Den må du sjå. Eg forelska meg litt i Zach Braff då eg såg denne filmen. Altså som skodespelar. Det er han som speler i Scrubs og han har faktisk både regissert og skrive filmen Garden State i tillegg til at han speler hovudrolla. Respekt. Musikken i filmen er òg veldig bra. Eg kan blandt anna nemne "The Only Living Boy In New York" frå forrige innlegg og songen som er på dette klippet; "New Slang" av The Shins.
Og så ynskjer eg meg eit slikt smykke som du ser på 2:40 til jul. Så veit du det.

Kva film er din favoritt?

The Only Living Boy In New York

2009-11-27T08:37:00.000-08:00

For tida går denne songen på repeat både i hovudet mitt og på rommet mitt. For tida synest eg denne songen er så fin at eg ikkje skal prøve på å forklare det med ord ein gong. For tida er eg forelska i den einaste levande guten i New York.

Kva er den finaste songen du veit nett no?

Kva samlar de på?

2009-11-27T05:47:00.000-08:00

Eg tykkjer det er så kjekt når folk samlar på ting og skulle ønskje eg hadde ei flott samling av noko, men mine samlingar er heller ussle.

Glascolakorkar: seksten.

Magnetar på kjøleskapet (saman med Kathrine): 2

Elles kan eg nemne at eg, då eg var mindre, hadde ei ganske stolt serviettsamling.

Samlar du på noko?

Eg vil starte å samle på fine boksar, slike som desse.

Og så vil eg samle alle dei fine augneblinkane og putte dei i ein gamal koffert så eg kan dra dei fram på mørke dagar.

tenk

2009-11-27T05:35:00.000-08:00

at Knut Hamsun var trikkekonduktør i Chicago.

Kanskje det er det eg skal bli? Kva skal du bli?

Den daglege dosen

2009-11-27T05:18:00.000-08:00

Sjeldsynt
Løyndom
Samstundes
Røynleg
Framleis
Gruvlande
Keisemd
Kjensle
Von
Kjærleik

Berre så eg er sikker på at de har fått den nynorsken de treng på den siste fredagen i november. Fine ord, ikkje sant?

Ein vert ikkje heit av det ein ikkje veit

2009-11-27T01:20:00.000-08:00

Alternativ prøveøving

2009-11-26T11:43:00.000-08:00

I vindfanget heime er det ein kyrkjegard, i gongen går ein apekatt bananas, i trappa står ei smilande jente, og til ho seier eg "kom te meg". I gongen oppe ser eg ei dame ved ei mølle.

sweet

2009-11-26T00:33:00.000-08:00

vanlegvis er sukkersøtt altfor søtt. i dag er sukkersøtt akkurat passe.

i morgon, i morgon, men ikkje i dag

2009-11-23T14:14:00.000-08:00

i morgon skal eg ta på meg skjørt og kanskje flette håret og gjere meg heilt ferdig med gymnaslæraren før eg skal lage blåbærmuffins til heile familien og kanskje skal eg lage pannekaker til middag? Eg får sjå. Eg skal i alle fall høyre på mykje fin musikk og feire, feire at eg er ferdig med norskoppgåva!

kva skal du gjere?

verda rundt kaffi- og tekoppar.

2009-11-22T16:24:00.000-08:00

i dag prata eg og rebekka om mange land:
sakteland. sjø og land. klappeland. england. irland. skottland. bakvendt land. (vi snakka òg om fleire andre land, men dei har ikkje namn som sluttar med -land, og er derfor ikkje like kjekke å ramse opp)
no reiser eg til drøymeland.

-om du kunne velje, kva land ville du vore i akkurat no?

tre ord som smiler til meg i dag

2009-11-22T15:31:00.000-08:00

vågen er open.

2009-11-21T15:52:00.000-08:00

Når eg ein gong opnar kafé, skal Odd Nordstoga få kome og halde intimkonsert. Så heldig er han.

Heim til mor

2009-11-21T15:14:00.000-08:00

Det er godt å komme heim til pappa sine vitsar som er så dårlege at dei er til å le av, mamma sin overtrøytte latter til ein film seint om kvelden, ei litle-litlesyster sine hjartelege klemmar, ein bror som har vitsar som er endå betre enn pappa sine, og ei syster som snart kjem heim ho òg. I tillegg til besteforeldre som fortel så fint om gamledagar og som bestemt meiner (i alle fall bestefar) at 50-talet må vere den beste tida nordmenn har opplevd.

I kveld tykkjer eg eg er heldig.

(ein gong skal eg bli like god som Odd'n til å spele munnspel. vertfall nesten. foreløpig held eg meg til luftmunnspel.)

danserinna i meg

2009-11-20T01:09:00.000-08:00

(klikk på biletet for kjelde)

Somme gonger, kanskje nettopp på regnfulle dagar som denne, med sigur ròs som fyller rommet og får meg til å snurre piruettar som berre det, tenkjer eg at eg kunne hatt eit stort talent som danserinne av eitt eller anna slag. Det er berre ingen som har oppdaga det endå. Ikkje eingong eg har oppdaga det heilt. Men om det hadde blitt jobba litt med, finpussa litt på og fått sjansen til å utvikle seg, tørr eg nesten ikkje tenkje på kva resultatet hadde blitt. Innlevinga er der definitivt.

Det er fint å drøyme litt. Foreløpig vert det dog berre meg sjølv som får gleda av dette talentet som dukkar opp på regnfulle dagar som denne.

(Noko eg faktisk kan er å halde eit kort, ein gaffel ol. med haka. Heilt sant. Så ring meg om de treng underhaldning til julebordet!)

Kva er ditt skjulte talent?

willy rizzo

2009-11-19T09:18:00.000-08:00

Fann fleire bilete av same fotografen som fall i smak. Men sjølv om brillene til kjekkasen i bilete #1 er aldri så kule, er framleis biletet frå det førre innlegget absolutt favoritten.

dagens kunstinnslag

2009-11-19T01:46:00.000-08:00

I dag fann eg dette biletet og tenkte at det måtte eg dele med dykk. Det er noko med det som gjorde at eg fall pladask for det.

på ein regnfull novemberdag

2009-11-18T00:01:00.000-08:00

kan du varme deg på denne!

Eg veit vertfall at denne songen varmar meg aldri så lite om hjatrta.

mona lisa smil og andre smil

2009-11-16T13:55:00.000-08:00

eg tenkte litt og kom til å tenkje på at det er så fint med smil. Og at noko av det som er så fint med smil, er at det fins så mange forskjellige typar smil.

Hin dagen såg eg for eksempel ein gut som gav ei jente ei heil rekkje med forelska smil. nyforelska smil. Og i dag gav Kathrine meg eit løyndomssmil. Det vil sei eit smil som berre vi skjønar kva tyder. Somme gonger er det berre ein sjølv som veit om løyndomen bak smilet. Eg smilar ofte tankesmil. Det er slike smil ein smiler for seg sjølv der ein går og tenkjer på noko som får ein til å smile. Og det fins så mange fleire! Har du nokre på lager? smil meinar eg?

i ein boks på mitt rom

2009-11-16T09:38:00.000-08:00

i ein boks på mitt rom ligg det £1.42. dei skal eg bruke for alt dei er verd i vinterferien då eg skal til England baby! med gode Rebekka. kva trur du eg får for £1.42 i London?

Kvardagssmil

2009-11-15T04:21:00.000-08:00

Dette fekk meg til å smila i går:
-frukost rundt kjøkenbordet hos kjære Linn Borgny
-å sovne til The Beatles sin song "Good Night" på bussen (vertfall halvsovne).
-kaffi og avis på Baker Brun
-mannen i musikkbutikken som reiv ned alt han kom over då han skulle vise meg munnspel (ja, eg skal lære meg å spele munnspel. lett.)
-2 stk gratinerte pannekaker, 2 stk glascola, 1 stk søster og god musikk på Capello
-gutane på Kaffimisjonen som såg ut som dei hadde planlagt kva dei skulle ha på seg, endå dei ikkje kjende kvarandre. (Ja, eg var innom tre kaféar på ein dag...)
-at det var tre ulike "levande statuar" på torgalmenningen. Samtidig. Snakk om konkurranse.
-Napoleon Dynamite-klipp på youtube

Kva har du smila av i det siste?

Do you remember?

2009-11-11T00:05:00.000-08:00

I know a place

Eit ustødig kjøkenbord omringa av skeive kjøkenstolar. Eg søler kaffi frå koppen eg ikkje likar. Bob Marley ljomar både frå høgtalarane og frå Bob Marley-fyren sin munn (derav kallenavnet).

My cup is running over

Espressomilkshake får eg endå det ikkje står på menyen. Eg kan til og med lage den sjølv om eg vil, seier Bob. Eg lar han gjere det. På veggen heng så mange fine og rare ting at ein får auge på nye ting kvar gong ein er der. Vert aldri lei av å sjå.

Folk snakkar engelsk rundt meg. Ei gamal dame spelar kort med ein unggutt. Ein mann tar sitt glas vin som eg har sett han gjere så mange gonger. Eg smiler.

The sun is shining

Sakn. Løft din kaffikopp og skål for Vågen Fetevare.

kaffikjærleik

2009-11-09T07:59:00.000-08:00

prøveøving. kaffi. sjokoladehjarte.

barnebursdag

2009-11-08T10:26:00.000-08:00

"Den drømmende Marita pynter seg oppi treet."

Adjektivsetningar i bursdagar er kjekt. I bursdagen eg, Johanne og Marie hjalp til med i dag (russeteneste) var det ei som heite Marita, og setningen hennar vart slik. Eg syns den var så fin, så eg måtte berre skrive den, sjølv om den ikkje eigentleg er min.

Om eg skulle pynta meg i eit tre, hadde det nok sett litt slik ut

eller slik

Folk av Tunisia

2009-11-08T01:34:00.000-08:00

Framnes set sine spor i mange. Nokon set sine spor på Framnes

2009-11-07T07:54:00.000-08:00

Og månen lyser kvit..

2009-11-05T09:58:00.000-08:00

Tidlegare i kveld stod eg med hovudet ut glaset på mitt rom her på framnes og beundra måneoppgangen, om eg kan kalle det det, for det var jo det han gjorde, månen, han gjekk opp, opp frå bakom fjella på andre sida av fjorden. Og om det var vakkert! No står han rund, nåja, meir eggforma kanskje, og lyser i ei gul stripe ned på fjorden. Og stjernene rundt er glitter på himmelen, ja, lik diamantar er dei, himmelske diamantar.

Og når ein ser dette, som er så stort, så fjernt, så vakkert, kva er då eit lite menneske, kven er då lille meg, at Gud hugsar på og tek seg av meg?

Les salme 8 i kveld og gled deg i lag med meg.

musikk for kropp og sjel

2009-11-01T10:43:00.000-08:00

I det siste har eg høyrd mykje på Jens Andreas Kleiven. Det har eg fått ein del ut av og eg tenkte eg skulle dele det med dykk. Musikken er god mot øyra og i motsetning til mykje anna musikk er tekstane verdt å lytte til. Spesielt godt likar er songane "Everyday" og "I'm Free".

Om du har spotify kan du høyre på heilt "Moments"-albumet her.

Dersom du ikkje har spotify kan du høre på nokre av songane hans her.

Denne mannen kjem òg på kongshaugfestivalen dersom du har tenkt deg dit.

Ha ei heidundrandes flott veke!

ein tanke og to

2009-10-31T14:14:00.000-07:00

Heidu! no kom eg nett inn døra frå eit herleg møte i peisestova her på Framnes der Arne-Prest las eit bibelvers eg beit meg merke i. Verset finn du i Filipparane 2, 1-5 og lyder slik:

Om det no er trøyst i Kristus, glød i kjærleiken, fellesskap i Anden, om det finst medkjensle og miskunn, så gjer mi glede fullkomen: Ha same sinnelaget og same kjærleiken, og ver eitt i sjel og sinn. Gjer ikkje noko av sjølvhevding eller lyst til tom ære, men ver audmjuke og set dei andre høgare enn dykk sjølve. Tenk ikkje berre på dykkar eige beste, men òg på det som er godt for dei andre. Lat det same sinnelaget vera i dykk som òg var i Kristus Jesus!

Tenk om vi alle hadde levd våre liv etter dette; å bli meir lik Jesus. Tenk korleis verda kunne ha vore. Det er villt å tenkje på. Heilt villt. Crazy bananas. Men så er det òg så hardt. Ein set som oftast seg sjølv først. Eg skal vere ærleg å sei at eg i alle fall gjer det. Så korleis kan vi bli betre på det?

Eg tenkjer at vi kan lese i bibelen og på den måten bli oppmuntra til å gjere det som er rett og godt. Slik eg i dag vart oppmuntra av dette verset og var klar for å gå ut å gjere godt mot alle. Må tru om det hjelp å lesa dette verset kvar morgon og bruke det som ei slags påminning på korleis eg vil vere kvar dag. For det er verkeleg slik eg vil leve mitt liv.

Les òg romarane 12 som er litt som ei oppskrift på kva vi skal leggje vekt på i våre liv som kristne.

Eg tenkjer òg at vi kan vere flinke til å oppmuntre kvarandre til å gjere det som er godt i staden for å f.eks. kappast i å baktala kvarandre.

Kva tenkjer du?

-Thank you and good night.

2009-10-29T02:03:00.000-07:00

Og eg fortset å blogge i bilete. Denne gangen i form av mine viskelær.

a day in the life - tilfeldige bilete frå ein tilfeldig dag

2009-10-27T23:57:00.001-07:00

Morgontryne

Fargar

Hedersplassen

Hei i speilet

Strømpebuksebein i yndlingsstolen

fotoboks er nesten like gøy som eg tenkjer at eit polaroidkamera ville vore. men berre nesten

2009-10-27T15:03:00.000-07:00

Om du har eit ekstra polaroidkamera (sånn kamera som spyttar bileta ut med ein gong du har teke dei) veit du kva du skal gjere med det.

Om det berre var ved lunsjtid på tirsdag

2009-10-25T08:24:00.000-07:00

Det er så mykje som er finare enn å lese historie:

Å stå og sjå ut glaset på lauvet som liknar sommarfuglar på marka som i ny og ne flagrar opp - gule, raude, viltre - og finn seg ein ny og kanskje finare stad å slå seg ned, før dei på ny flagrar bortover marka, høgt opp i haustlufta eller opp i eit tre, kanskje det treet dei ein gong kom frå.

Eller å gå langs hyllene med bøker og bøker på biblioteket, som er så stille som berre eit bibliotek kan vere, og plukke ut ei tilfeldig bok der nokon har skrive så fint om sin store lidenskap for kaier (fuglar) og tenkje at det er rart, og fint, korleis folk kan vere så opptatt av og bli så fascinert av vidt forskjellige ting.

Akkurat no skulle eg ynskje eg var ein av dei som lett lar seg fascinere av det som står skrive i historieboka i staden for av bileta boka òg inneheld...

haust iii

2009-10-21T14:05:00.000-07:00

Å kjenna håret dansa viltert rundt hovudet i vinden som er av den typen som får deg til å halda godt på jakken og kjenna at du lever. Å mysa mot sola som skin gjennom trea som stadig har færre blader. Å vassa i lauv i alle haustens nydelege fargar heilt opp til anklane.

Ein sorgens dag

2009-10-16T02:21:00.000-07:00

Ein særs oppsiktsvekkande nyhet møtte meg då eg landa i Kristiansand i går kveld og slo på mobilen. Eg kjende det stakk langt inne i hjarterota. Heilt seriøst. Eg veit ikkje kvar eg skal gjere av meg. Berre sjå sjølv.

No er eg klar for...

2009-10-03T06:04:00.000-07:00

..å fly

..kameltur

..å ligge i sovepose under stjernene midt i ørkenen

..nye inntrykk og fargar

..marked

..å sove på hotell

..anleis mat

..strender

-No er eg klar for TUNISIA!

Vakre ord

2009-10-02T01:49:00.000-07:00

"Ja, hvad var Kærligheden? En vind, der suser i rosene, nej, en gul Morild i Blodet. Kærligheden var en helvedeshet Musik, som faar selv Oldingers Hjærter til at danse. Den var som Margeritan, der aabner sig på vid Væg mod Nattens komme, og den var som Anemonen, der lukker sig for et Aandepust og dør ved Berøring. Slig var Kærligheden."

"Kjærligheten er Guds første Ord, den første Tanke som sejlet gennem hans Hjærne. Da han sa: Bliv lys! blev det Kjærlighet. Og alt han hadde skapt var såre godt og han vilde intet ha ugjort igjen derav. Og Kjærligheten blev Verdens Ophav og Verdens Hersker; men alle dens Veier er fulde af blomster og Blod, Blomster og Blod."

-Fra Victoria av Knut Hamsun

Jammen kom det noko godt ut av særemnet òg.

Framtidsdraum

2009-09-29T20:50:00.000-07:00

Eg drøymer om å ein gong opne min eigen kafé, og har allereie mange planar for korleis den skal vere.

Eg skal berre selje brus på galsflasker, som denne franske lemonaden

Med slik kork

No og då skal eg ha blåbærpai-dag. Det vil kanskje sjå litt sånn ut

Eg skal selje all mogleg slags kaffi med fine, fine mønster i skummet

Kaféen skal òg ha ein liten klesavdeling med bl.a. fine brukte kjolar ein kan kjøpe, som kanskje lignar litt på desse

Så vonar eg du tek ein tur innom!

vanlig hesterumpe

2009-09-29T20:01:00.000-07:00

I hylla mi står det eit eksemplar av Floraen I Farger frå 1955 som eg kjøpte for fem blanke kroner på loppemarked. Eg likar fire ting ved den boka.

Dette likar eg:

-Den er gamal og fin lyseblå utanpå
-Det er vakre illustrasjonar i fargar, som tittelen seier, inni
-Den tidlegare eigaren har flittig notert viktige ting ein bør merke seg ved sida av illustrasjonane
-Den er full av fine og rare namn på ulike blomar

Fine blomenamn frå boka:

-Vårveronika
-Hjortetrøyst
-Forglemmegei
-Hjartegras
-Perlevintergrøn
-Marsfiol
-Maigull
-Nattfiol
-Vanlig hesterumpe

Kva står i hylla di?

haust ii

2009-09-21T06:38:00.000-07:00

Tidlegare skreiv eg eit innlegg om fine ting ved hausten. Her kjem innlegg #2 om det same. Du skal ikkje sjå så langt vekk i frå at det kjem eit #3, #4 og kanskje tilogmed eit #5 etterkvart. Det er nemleg ikkje reint lite eg likar ved hausten.

Eg likar:

-å sjå at bakken tettast med lauv i alle haustens friske, fine fargar og å høyre dei knase deilig under føtene. Det er òg fint når lauvet dalar så fint over hovuda våre.

Ei god helg

2009-09-20T02:37:00.000-07:00

Denne helga har vore ei av dei finare så langt.

Fredag:
-liggje i sovepose på "verdens ende" og sjå på den fantastiske stjernehimmelen

Laurdag:
-Lage og ete pai med gode vener (oppskrift)
-Ha på seg kjole i det nydelege vêret

-sitje i ein sofa med sovepose, teppe og putar ute på graset og sjå filmen Gran Torino medan haustlauvet regnar over hovuda våre

Pai med salat

Gran Torino er forresten ein fantastisk film som alle må sjå. Helst ute. Den står no høgt blandt mine yndlingsfilmar.

Søndag (så langt):
-Ete pairestar til frokost og høyre på deilig musikk
-lage deilig smoothie med Marit og Sigrund

three other great artichokes might still take me home

2009-09-19T01:35:00.000-07:00

Kven treng kjøleskap når ein har internett?
Klikk på bilete for å lage din eigen kjøleskap-poesi.

Please Mr Postman

2009-09-17T08:07:00.001-07:00

No har eg nett ete nokre seigemenn eg fekk i posten i dag. Om du vil gjere med glad kan du sende meg seigemenn i posten. Eller blåbær, haustblader, blonder, gode ord, ein kopp kaffi, eit smil, ein klem, ein fin sang eller eit sirkus.

Kva ville du hatt i posten?

Apropos

2009-09-15T23:47:00.000-07:00

av og til tenkjer eg at det hadde vore fint om ein kunne bestilla ein franskmann som berre kunne sitje og snakke fransk til deg. Det hadde ikkje spela noko rolle om han snakka om grisar eller makronar. Det hadde berre gjort det endå meir vidunderleg at ein ikkje ana kva han snaka om. Fransk høyres vakkert ut uansett.

I dag har eg slappa av med Yann Tiersen som eg snakka om i forrige innlegg. Han er fransk. Han syng. Han syng på fransk. Og i nokre sangar snakkar han nesten meir enn han syng. Det er fint å høyre på.

Eg vil til Paris. Vil du? Om ein ikkje kan reise med det første kan ein jo alltids lage seg eifeltårn-niste medan ein høyrer på Tiersen.

piano og tåspiss-sko

2009-09-15T08:30:00.000-07:00

Av og til er eit piano meir enn eit heilt band. Av og til er alt ein treng Yann Tiersen og eit piano. No har eg ikkje nokon av delene, men spotify er bra til eg finn noko betre. Høyr sjølv då. Og om du tykkjer tåspiss-sko og film som ser gamal ut er vene ting er det vert å sjå videoen og. kanskje.

Vakkert vel?

Kva er sjansen?

2009-09-11T02:02:00.000-07:00

I går høyrde eg på Mark Knopfler på spotify. Eg merka meg spesielt coveret på "A Ragpicker's Dream" fordi eg syns det var eit nydelig bilete (eg er veldig glad i foto..).
I dag, no nettopp, besøkte eg ein annan blogg (http://hjartesmil.blogg.no/), der bloggaren hadde lagt ut nokre bilete av ein fotograf som heitte Elliott Erwitt. Eg syns bileta var fine og googla denne fotografen for å sjå om eg kunne finne endå fleire fine bilete. Trur du ikkje eg fann nettopp det bilete som er på coveret til "A Ragpicker's Dream" då? -Ein herleg tilfeldighet.

Eg tar med ein sang frå albumet òg. "A Place Where We Used To Live". Nydeleg.

Eg kan herved anbefale både Mark Knopfler og Elliott Erwitt.

I am the eggman..

2009-09-09T00:18:00.000-07:00

Kva er vel som å stå opp ein time seinare enn du pleiar, dusje, høyre Johnny Cash si djupe stemme frå høgtalarane medan du kokar eit egg til frokost og "kakkar" det for å finne ut at det er akkurat passe kokt. Om du kokar eit egg i ca 12 min vert det akkurat slik eg vil ha det. Korleis var din morgon?

Haust

2009-09-01T09:09:00.000-07:00

Det er 1. september. Det er haust.
Kvar haust snakkar dei på Framnes om "november-syndromet", eller kva det er dei kallar det, og seier at hausten kan vere deprimerande og at folk vert trøytte og leie og så bortetter. Dei har ikkje starta endå, men det kjem, eg veit det kjem, og det er deprimerande. Eg tykkjer i grunnen at hausten er ei fin årstid og tenkte derfor at eg skulle skrive litt om kva eg tykkjer er fint med den. Eg startar i dag med:

Avslappande innestunder i godstolen med "let it be" på platespelaren, akkompagnert av plaskregnet og det mektige tordenvêret. Kanskje med ei god bok eller ein kopp kakao i handa.
I dag hadde eg ei slik stund.

# 1

2009-08-30T13:04:00.000-07:00

I dag har eg funne første punkt på "ting å gjere før eg døyr-lista" mi:

-Fange ei eldfluge i eit glas.

Mannen i gata

2009-08-05T12:11:00.000-07:00

Eg har hatt lyst til å skrive noko fint om passerande folk ein kanskje berre ser ein gong og deira ukjende liv, men har ikkje heilt klart å formulere det. I dag las eg litt i "Appelsinpiken" og fann eit avsnitt som beskreiv det veldig fint;

"Jeg satt og så på alle menneskene som kom og gikk på plazaen, både lokalbefolkning og tilreisende. Det slo meg at verden er et vakkert sted. Igjen fikk jeg en slik euforisk følelse knyttet til alt omkring meg. For hvem er vi som lever her? Hvert eneste menneske på dette torget var som en levende skattekiste full av tanker og minner, drømmer og lengsler. Selv var jeg midt i hjertet av mitt eget liv på jorden, men det gjaldt selvfølgelig for alle de andre menneskene på torget også..."

-Jostein Gaarder, "Appelsinpiken"

Merkeleg. Fascinerande.

Down on the corner

2009-08-05T11:31:00.000-07:00

Ei god konsertoppleving kan koma når du minst ventar det; den kan vere rett rundt hjørnet. Ein dag i forrige veke hadde eg ei fantastisk oppleving på torgallmenningen i by'n, rett rundt 7/11 hjørnet i ly for plaskregnet. Eg fann samtidig ut at kanskje eg skulle kjøpe meg eit munnspill og begynne å spille, men eg har ei kjensle som seier at det er mykje vanskelegare enn det ser ut til, sjølv om mannen på torgallmenningen spela det samtidig som han spela både gitar og trommer... Ein av songane han og dottera spela var "Walk On The Wild Side" av Lou Reed. Den var nydeleg! Her får dykk Gee Gee & Soluna (gatemusikantane) sin versjon.

I tillegg spela dei bl.a. Creedence Clearwater Revival, Johnny Cash, Neil Young, The Beatles og Bruce Springsteen. Det var så bra at eg mista bussen.

Ferieluksus

2009-07-30T09:19:00.000-07:00

Frukost: Krabbe

Middag: Steikt makrell med poteter og rømme

Kvelds: Heimelaga blåbærpai

<3 Knopfler <3

2009-07-26T08:54:00.001-07:00

well, shake it, shake it, shake it, baby, now

2009-07-18T08:04:00.001-07:00

Eg går rundt og har konstant lyst på milkshake, men vi har ikkje is å lage med. Nedtur. Har kjøpt det på kafé eit par dagar i det siste og det er berre heilt fantastisk. Sist smaka eg milkshake med espresso - himmelsk.

utterly bollocks

2009-07-17T12:00:00.000-07:00

fotoboks er ei fin oppfinning. britisk er eit flott språk. pomes frites hjelper mot kvalme. gamle menn med skjegg og rynker tek seg godt ut på bilete; helst svart/kvitt bilete. følg draumane dine heile livet og unngå å tenkje for mykje. tenking er for pingler.

Referat frå dagens bytur med Rebekka

Hurra for Radio Norge

2009-07-12T10:22:00.001-07:00

som spelar Pink Floyd til meg når eg er på jobb!

Det er noko med å høyre songar ein liker på radio, eller i ein butikk eller på ein kafé. Du set liksom større pris på dei då. Blir ekstra glad. Det er så lettvint å trykke på play på iPoden, men når du tilfeldigvis høyrer favorittsangen din ein stad du ikkje forventer å høyre den vert gleda ofte større. Som for eksempel på jobb i dag då eg høyrde Shine On You Crazy Diamond på radioen. Eller då eg høyrde Help! ljome ut av høgtalarane frå toalettet på Kaffekompaniet.

Av og til tenkjer eg at ting har vorte altfor lettvint. Av og til skulle eg ynskje eg vaks opp nokre tiår tidlegare og spara iherdeg til den nyaste Beatles-plata. Når ting er så lett tilgjengelege trur eg vi set mindre pris på dei. Det vert liksom ikkje heilt det same.. Eg har byrja å kjøpe Beatles sine album, eitt og eitt, i den rekkjefølga dei kom ut. Det er kos. Litt meir kos enn å laste ned alt på ein gong, tykkjer eg. Litt meir stas. Vi treng litt stas i kvardagen.

Run, Forest, run!

2009-07-11T06:46:00.000-07:00

I går såg eg filmen Forest Gump i lag med 1stk søster og 1stk kusine. Det var lenge sidan eg hadde sett filmen sist og eg hadde jammen gløymt kor fantastisk god den filmen er. Full av godbitar! "a box of chocolates" rett og slett..

Bær og sånn

2009-07-08T12:58:00.000-07:00

Av og til skjønar eg ikkje bæret av noko som helst.

Ps: Eg vert like forbløffa kvar gong eg tenkjer på at bananer er bær.

Kvil i fred, Popkongen

2009-06-26T13:59:00.000-07:00

Eitt ord: UNIK

2009-06-21T09:06:00.001-07:00

Eg lette etter ein sang. Eg fann han ikkje, men eg fann denne. Det var ikkje verst.